Невил сонува победа?!

Гери Невил, од моментот кога е назначен за тренер на Валенсија, со клубот одигра девет натпревари во првенството на Шпанија и сѐ уште нема забележано победа. Лошите резултати ја донесоа Валенсија во долниот дел на табелата, а доколку Англичанецот рапидно не ги промени работите, неговиот тим ќе се бори за опстанок во лигата.

 

Невил, во неделата, по поразот од Бетис, се соочи и со навивачите, кои се собраа пред клупските простории барајќи негова оставка.

 

„Не размислувам дека можеме да испаднеме од лигата, туку како да ги свртиме работите во наша корист. Знаете, ова е мојата 30-та прес конференција и секогаш ми го поставувате истото прашање. На навивачите не им требаат зборови, туку дела. Сакам да се фокусирам само на фудбалот и на победите“, им изјавил на шпанските медиуми Невил.

 

Поранешниот десен бек на Манчестер Јунајтед, на клупата на Валенија го наследи Португалецот Нуно Еспирито Санто.

 

„Фудбалот е суров спорт. Некогаш победувате кога не играте добро. Ние на неколку натпревари игравме добро, а не победивме. Меѓутоа верувам дека доколку продолжиме да работиме и играме добро, дека победите ќе дојдат“, дополнил Невил.

 

Валенсија, во Примера, се наоѓа на 14-то место на табелата со 25 освоени бодови.