Москва размислува за размена на украински заробеници за Виктор Медвешчук, пријател на Путин

Русија ќе ја проучи можноста за размена на заробените војници на украинскиот баталјон „Азов“ за Виктор Медведчук, пријателот на Владимир Путин, изјави рускиот пратеник и преговарач Леонид Слуцки.

-Ќе го проучиме тоа прашање, рече Слуцки, член на руската делегација на последните преговори со Киев, одговарајќи на прашање за таква размена, пренесоа руските медиуми,

Во изјавата што ја даде во Доњецк, сепаратистичкиот град на југоистокот од Украина, тој додаде дека за таквата можност во Москва ќе разговараат „оние кои се овластени за тоа“.

Виктор Медведчук (67) е политичар и богат украински бизнисмен познат како личност блиска до рускиот претседател. Во средината на април, Медведчук беше заробен во Украина откако побегна од офанзивата на Кремљ кон крајот на февруари.

Медведчук е во домашен притвор од мај 2021 година, откако беше обвинет за „велепредавство“ и „обид за ограбување на природните ресурси на Крим“, украинскиот полуостров што Русија го анектираше во 2014 година.

Во петокот руската армија објави дека се предале и последните украински бранители на стратешки важниот Мариупол, кои со недели даваа отпор од огромната фабрика за челик „Азовстал“.

Меѓу нив има и членови на баталјонот Азов, единица која Кремљ ја смета за „неонацистичка“ и која Киев сака да ја врати во замена за руски затвореници.

На 26 мај, рускиот Врховен суд треба да го разгледа барањето за прогласување на баталјонот „Азов“ за „терористичка организација“, што би можело да ја отежне размената на затвореници.