Нов проект на Здружението на граѓани „Благородна мисија“ од Кочани

Здружението на граѓани „Благородна мисија“ од Кочани стартуваше со нов проект под наслов „Подадена рака“ кој има за цел да ја подобри работата на Центарот за донации кој работи во состав на ова здружение. Проектот ќе се реализира со средства добиени од Владата на Република Македонија. 

- За реализација на проектот „Подадена рака“ добивме грант од 300 илјади денари кои ќе ги намениме за работење на Центарот за донации, кој е сместен во поранешните простории на Центарот „Порака“. Проектот ќе се реализира до крајот на оваа година и во него ќе бидат вклучени двајца волонтери, изјави Лидија Ефтимова, претседател на Здружението „Благородна мисија“ од Кочани.

Аника Илијеска Ѓоргиева од Секторот за труд и социјална политика во Локалната самоупрва на општина Кочани ја истакна ангажираноста на општината да се обезбедат простории за Центарот за донации во кој граѓаните ќе можат да донираат облека и други предмети за домаќинството, наменети за социјално загрозените лица.

Во проектот „Подадена рака“ покрај жителите од територијата на општина Кочани ќе бидат вклучени и жителите од соседните општини Зрновци и Чешиново Облешево.