Нови изданија на романите „Резервен живот“ и „НО-УИ“ на Лидија Димковска

„Или-Или“ објави второ издание на романот „НО-УИ“ и четврто издание на романот „Резервен живот“ на наградуваната  авторка Лидија Димковска. 

„Резервен живот“ ги доби Европската награда за литература и „Стале Попов“ на ДПМ. Досега е објавен на англиски, словенечки, српски, хрватски, унгарски, бугарски, чешки и италијански, а оваа година ќе излезе и на арапски, украински и летонски. Во октомври 2016 година беше претставен на промоции и читања на книжевна турнеја во десет американски градови и беше номиниран за наградата „Најдобра книга во превод 2017“.

„НО-УИ“ во моментов се преведува на неколку европски јазици, а на Саемот на книгата во Лајпциг годинава, на покана на „Традуки“, романот беше претставен со извадок на германски јазик и разговор со авторката.

Лидија Димковска (1971, Скопје) завршила општа и компаративна книжевност на Филолошкиот факултет во Скопје, а постдипломски студии по романска книжевност на Филолошкиот факултет во Букурешт, каде што работела како лектор по македонски јазик и книжевност.  Живее во Љубљана, преведува романска и словенечка литература на македонски јазик.