Новогодишен планинарски марш на Пелистер

Планинари рекреативци од Битола и неколку македонски градови ја продолжија традицијата со новогодишно искачување на врвот Пелистер, висок 2.601 метар.

Годинава највозарасен учесник е новинарот и фоторепортер Петар Ставрев кој иако во деветтата деценија од животот без проблеми се искачи на врвот планината и на дежурната екипа на радио-телевизискиот пункт „Пелистер“ им подари шампањ.

– Скоро три децении, на 2 јануари заедно со планинари од градот и државата се искачуваме до врвот Пелистер, а потоа според мојата лична традиција на вработените во пунктот „Пелистер“ им ја честитам Новата година и им подарувам шампањ. Годинава на своето работно место се Душан Трајкоски, Пеце Стефановски и Пецо Стојчевски со кои како највозрасен учесник им раскажав за долгогодишната традиција кон која се приклучуваат и младите, а годинава најмладиот учесник има шест години, изјави Ставрев за МИА.

Новогодишниот планинарски марш почна утрово во 6:30 часот, а до врвот Пелистер се искачија за пет часа минувајќи ја традиционалната патека од местото викано Палиснопје, преку Ловечка куќа па се до врвот на планината каде денес сончевото време им овозможи прекрасна глетка на радио-телевизискиот предавателен пункт „Пелистер“.