Оланд предлага формирање „влада на еврозоната“

Франција е подготвена да учествува во „засилена организација“ на еврозоната и заедно со другите земји кои ќе се согласат на тоа, да создаде „една авангарда на Европската унија“, наведува францускиот претседател Франсоа Оланд во текст објавен во денешното издание на неделникот „Журнал ди димашн“.

Како што јави дописникот на МИА од Париз, францускиот претседател во својот авторски текст посакува создавање на „влада за еврозоната“.

- Еврозоната оваа недела да ја потврди својата кохезијам, наспроти Грција. Тоа во голема мерка се должи и на квалитетот на француско-грчките односи. Европскиот дух преовлада, пишува Оланд во посебното издание посветено на 90-от роденден на поранешниот претседател на Европската комисија, Жак Делор.

- Но, ние не можеме да останеме на ова. Јас предложив да ја преземиме идејата на Жак Делор за влада на еврозоната и да се изработи посебен буџет, како и Парламент за да се обебзеди демократската контрола, додава францускиот претседател.

Спорд него, споделувањето на една валута значи „многу повеќе од тоа да се сака само усогласување“. - Тоа е избор на 19 земји, кои тоа го направија, бидејќи тоа беше во нивни интерес. Ниту една влада, од друга страна, не ја презеде одговорноста да излезе (од еврозоната), продолжува Оланд.

- Овој избор бара засилена организација и Франција е подготвена заедно со земјите што ќе согласат на тоа, да создаде една авангарда, бидејќи како што ни покажа Жак Делор нештата секогаш стануваат поголеми кога Франција ја има иницијативата во Европа, оценува тој.