Операција на ЕУ против шверцерите на мигранти

ЕУ ја започна операција за откривање на бродови во јужниот Медитеран, што се користат за шверцување мигранти.

Во оваа операција, наречена „Софија“, учествуваат воени бродови од неколку земји- членки на ЕУ, кои имаа задача да ги откријат и запленат бродовите за кои постои сомнеж дека се користат за илегално префрлње мигранти од брегот на Северна Африка, најчесто од Либија, кон европското копно.

Ова е првпат воена флота на земјите од ЕУ да се вклучи во една ваква поморска операција. ЕУ досега учествуваше само во операции на надгледување и „шпионирање“ на шверцерските бродови и чамци, како и во спасувањето на мигрантите.

Повеќе од 130 илјади луѓе, главно мигранти од африканските земји, се префрлија на овој начин до брегот на Европа, а околу 2.700 се удавија во текот на опасното патување по Медитеранот.

Многу повеќе бегалци и мигранти, од земјите на Блискиот Исток, а најмногу од Сирија, сега користат друга траса за префрлање до ЕУ, прво движејќи се низ Турција до нејзиниот западен брег, а од таму со шверцерски бродови до грчките острови.

Преку Грција која е членка на ЕУ, мигрантите и бегалците се префрлаат до Средна Европа, настојувајќи да дојдат до запданоевропските земји, пред се во Германија.

Мигрантската криза која ја потресува ЕУ е главна тема на денешното заедничко обраќање на францускиот претседател Франсоа Оланд и на германскиот канцелар Ангела Меркел во Европскиот Парламент.