Орбан: Украина и понатаму ги блокира испораките на нафта за Унгарија

Унгарскиот премиер Виктор Орбан го обвини претседателот на Украина, Володимир Зеленски, дека и понатаму не ги обновува испораките на нафта преку нафтоводот „Дружба“, со што ја загрозува енергетската безбедност на Унгарија.

Испораките на нафта мора веднаш да продолжат! Знаеме дека нафтоводот е оперативен. Знаеме дека испораките на нафта за Унгарија не се продолжени поради политичка одлука на претседателот Зеленски, напиша Орбан на Х.

Тој додаде дека Зеленски „низ Брисел тврди дека нафтоводот не може повторно да се пушти во работа“. Унгарскиот премиер наведе дека очекува Украина да ги исполни своите обврски кон Европската унија и нејзините членки и повторно да ги почне испораките.

Поради актуелната ситуација, Орбан изјави дека денеска ќе одржи консултации со премиерот на Словачка, Роберт Фицо.

МИА