Османи: Лојане – Миратовац станува симбол за напредок во регионалната соработка

Да се унапреди иницијативата за нов граничен премин со Србија кај месностите Лојане и Миратовац на повисоко ниво и наместо локален да се направи целосно меѓународен граничен премин.

Таква заложба најавија на денешната средба во Скопје вицепремиерот за европски прашања и координатор на проектот Бујар Османи и државниот секретар при српското Министерство за внатрешни работи и претседател на Комисијата за гранични премини на Србија, Милослав Миличковиќ.

Османи и Миличковиќ оценија дека новиот премин ќе претставува бенефит не само за граѓаните на пограничните општини, туку и за сите граѓани на двете земји преку забрзување и олеснување на меѓусебна комуникација.

Според Османи, Миратовац-Лојане станува симбол за напредок во регионалната соработка.

Тој информира дека е во финална фаза обезбедувањето на првите 2,5 милиони евра донација од  норвешката Влада во рамки на нордискиот проект УНОПС за реализацијата на овој проект.

– Ќе ве потсетам дека балканските народи се упатени едни на други и само со заедничка работа целиот наш регион може да стане регион на мир и просперитет. Во таа смислам многу е важно отстранувањето на препреките на слободниот проток на стоката, капиталот, услугите и луѓето, истакна Миличковиќ.

Тој оцени дека договорот што беше склучен меѓу српскиот претседател Александар Вучиќ, албанскиот премиер Еди Рама и премиерот на Северна Македонија Зоран Заев, за воспоставување на таканаречениот „Мал Шенген“ драстично ќе ја зголеми атрактивноста на сите три држави за директните странски инвестиции.

– Уверен сум дека за помалку од две години ќе можеме да видиме значаен процентуален раст во нашите земји бидејќи заедно ќе креираме подобра работна средина. „Мал шенген“ ќе доведе и до значајно зголемување на бројот на туристи во сите три земји. Во духот на „малиот шенген“ и олеснувањето на протокот на стока, капитал, услуги и лица, како и со цел олеснување на животот на локалното население, планираме да го отвориме овој граничен премин и да го услогласиме текстот кој ќе го усвоиме до крај на оваа година, посочи Миличковиќ.