Осуммина загинати во напад врз автобус во Алепо

Најмалку осум цивили загинаа денеска при воздушен напад врз автобус во градот Алепо на северот од Сирија, јави ДПА.

Според Сирискиот центар за мониторинг за човековите права, воените авиони што го извршиле нападот најверојатно и припаѓаат на сириската армија или на нивниот сојузник Русија.

Погодениот автобус се движел по патот Кастело Роуд, кој е стратешки важен, бидејќи претставува единствена врска меѓу деловите од градот што се под контрола од бунтовниците.

Последниве недели, сириските владини сили ги зачестија нападите врз овој регион во обид да издејствува барем привидна контрола врз деловите под управа на бунтовниците.

Алепо, кој пред почетокот на конфликтот беше главен трговски центар на Сирија, сега е поделен на западна зона, која е под контрола на владините сили, и источна, контролирана од бунтовниците.