Отворена изложбата „Скопје 1963 - пред и потоа“

По повод одбележувањето 52 години од катастрофалниот земјотрес што во 1963 година Скопје го остави во урнатини, синоќа скопскиот градоначалник Коце Трајановски ја отвори изложбата „Скопје 1963 - пред и потоа“ во Музејот на Град Скопје. 

- Од колективната меморија на скопјани не е избришан 26 јули 1963 година. Скопје се сеќава на неколкуте минути во кои жителите на нашата престолнина ја почуствуваа уривачката моќ на природата. И по 52 година од најтрагичните мигови на поблиското минато, во многу скопски семејства неизбришливи се сеќавата на катастрофалниот земјотрес, а бројните гробови се доказ за 1.070-те трагични човечки судбини. Во татнежот на земјотресот илјадници семејства ги загубија своите домови, а сериозно беа оштетени и објекти од јавен каратер, како што беа стариот театар и офицерскиот дом, рече Транаовски. 

За среќа, како што истакна, веста за пустошот што го остави катастрофалниот земјотрес бргу се прошири низ светската јавност, а хуманоста на светот не изостана.

- Набргу по трагедијата, во време на веројатно најголемата светска поделба, како резултат на студената војна, во нашиот град се состанаа Истокот и Западот со цел да ја ублажат болката и страдањата на скопјани. Ние и денес сме благодарни за првата помош што им беше пружена на нашите сограѓани што останаа без основни услови за цивилизиран живот, но и за изградбата на неколку градски населби како долгорочно решение за станбените потреби на скопјани, посочи Трајановски. 

Потсети дека Скопје денес е познат како град на солидарноста најмногу поради хуманитарниот ангажман на државите од Европа и светот, но и затоа што и скопјани, и жители на другите македонски градови, неуморно беа ангажирани во пружањето на непосредна помош на загрозените, но и во изградбата на еден речиси нов и модерен град.

- Во изминативе педесетина години ентузијазмот во развојот и изградбата не е смален и затоа Скопје решително се движи кон идеалот да стане соверемена престолнина, истакна Трајановски.

На изложбата, преку презентираниот материјал може да се види забрзаниот развој на градот. На одбраниот материјал е прикажано централното подрачје на Скопје пред земјотресот и потоа, до осумдесеттите години. Избрани се фотографии направени за изложба реализирана во Музејот на Град Скопје во осумдесеттите години на ХХ век, „Напоредни фотографии на Скопје“ и избор на фотографии од Киро Георгиевски, користени за изложбата „Старо Скопје“, реализирана во Музејот во 1993 година.

Посебен додаток на изложбата е донацијата на семејството Битољану на документарни фотографии на фотографот Томислав Петернек, снимени непосредно по земјотресот, за време на неговиот престој во Скопје.

На изложбата „Скопје 1963 - пред и потоа“ присуствуваа претседателот на Советот на Град Скопје Ирена Мишева и Амбасадорот на Руската Федерација во Република Македонија Олег Шчербак.