Отворени 25. Зимски олимписки игри во Милано Кортина

На специфичен начин со дефиле на спортистите на четири локации во Милано, Кортина, Предацо и Ливињо вечерва беа свечено отворени 25. Зимски олимписки игри. На Игрите ќе настапат околу 2.900 спортисти од 92 држави.

Македонскиот олимписки тим го сочинуваат: Ана Цветановска и Ставре Јада во нордиски дисциплини, а Јана Атанасовска и Виктор Петков во алпски дисциплини. Ова е најбројна македонска делегација на спортисти на нашето осмо учество на Зимски олимписки игри. Првиот настап македонските спортисти на ЗОИ го имаа во Нагано 1998 година.

Македонската делегација на отворањето беше на две локации, Јана Атанасовска беше знаменосец во Кортина, а Ставре Јада за кого ова се трети Игри го носеше македонското знаме во Предацо.

Натпреварите во некои спортови веќе се почнати, а во дел се одржуваат и официјалните тренинзи. Според програмата има 16 спортови и 116 дисциплини, а ќе има натпревари во 12 екипни натпреварувања. Бенин, Гвинеја – Биасу и Обединетите Арапски Емирати се држави кои го имаат првото учество на Зимски олимписки игри.

Главната церемонија на отворањето се одржа на стадионот „Сан Сиро“ во Милано, а беше насловена како „Хармонија“. Како специјални гости настапија музичките ѕвезди: Мараја Кери, Лаура Паузини и Андреа Бочели.

На отворањето се обрати и Кирсти Ковентри, претседателката на Интернационалниот олимписки комитет, како и претседателот на Италија Серџо Матарела.

Олимпискиот оган беше запален во Милано и во Кортина. Во Милано таа чест ја имаа легендарните италијански скијачи Дебора Компањони и Алберто Томба, а во Кортина тоа го стори Софија Гоџа.

МИА