Палмер утре во Приштина на средба со студенти и претставници на граѓанското општество

Специјалниот пратеник на државниот секретар на Соединетите Американски Држави (САД) за Западен Балкан, Метју Палмер, утре ќе престојува во Приштина, каде што ќе има средба со студенти и претставници на оргнизациите на граѓанското општество, објави Амбасадата на САД во Косово.

Засега нема информации за тоа дали освен со студентите и невладините активисти, на кои ќе им се обрати во Националната библиотека, Палмер ќе се сретне и со државни и политички лидери на Косово.

„Заменик-помошникот државен секретар на САД, воедно специјален пратеник на државниот секретар за Западен Балкан, Метју Палмер ќе се обрати на публика составена од студенти и претставници на граѓанското општество. По обраќањето, тој ќе одговара на прашања од таа публика. Настанот е закажан за во 15 часот, в петок“, се наведува во соопштението на Амбасадата на САД во Приштина.

Американскиот дипломат ќе престојува во Косово по еднодневната официјална посета на Северна Македонија.