Пензионерите следната година просечно ќе добијат 10.000 денари повеќе или околу 850 денари месечно поголема пензија

Ако останевме на стариот модел од претходната Влада, пензионерите ќе добиеја зголемување од само 400 денари, а ние за цела следна година ќе даваме околу 10.000 денари повеќе или околу 850 денари месечно, изјави денеска премиерот Зоран Заев пред претставниците на здруженијата на пензионерите, објаснувајќи ги мерките за поголеми пензии.

На средбата во Сојузот на пензионерите, на која учествуваше и министерот за здравство Венко Филипче, премиерот Заев истакна дека покачувањето на пензиите е најавено уште во април оваа година, кога стана јасно дека економските мерки даваат резултати и дека приходите растат што овозможи Буџетот за 2020 година да биде посветен на човечкиот капитал и на грижата за пензионерите.

– И тоа не е симболично покачување. Напротив. Од јануари во 2020 година просечната пензија со предвиденото покачување ќе изнесува околу 15.500 денари. Владата за 2020 година предвиде покачување од 700 денари и дополнително усогласување од околу 200 денари, што значи дека пензиите ќе пораснат за околу 900 денари, рече Заев.

Во своето обраќање пред пензионерите, премиерот соопшти дека во Владата се прават анализи за подобрување и осовременување на системот на пензионерските и домовите за возрасни лица со вклучување на економски мерки, односно субвенции за инвестициите кои ќе вклучат грижа и поволни услови за изградба на домови за  пензионерите.

– Затоа централно место во Буџетот за 2020 година е грижата за човечкиот капитал, за луѓето, а во тој дел влегува и грижата за здравјето и грижата за нашите граѓани во социјален ризик на кои им ја зголемивме социјалната помош за 300 отсто истакна претседателот на Владата.

На мерките во здравството посебно се задржа министерот Филипче, кој ја издвои мерката за укинување на квотите за лекови која е во сила веќе две месеци.

Филипче истакна дека со укинувањето на квотите за лекови на рецепт, граѓаните имаат достапни лекови во кој било период од месецот, повеќе не стравуваат дека ќе останат без потребната терапија и дека драстично за само еден месец се смени сликата за проблемот којшто се провлекуваше со децении.

– Мерката со укинувањето на квотите за лекови на рецепт требаше да се направи многу одамна. Посетивме повеќе аптеки ширум државата и секаде викаат дека веќе е релаксирано. Нема гужва, секој може да добие лек кога сака. Ова е само еден дел од мерката на реформа во примарното здравство. Драстично за само еден месец се смени сликата за еден многу сериозен проблем којшто се провлекува со децении, потенцираше министерот Филипче.

На средбата, тој ги информираше пензионерите дека вакцинацијата против сезонски грип е почната и сите лица над 65 години можат бесплатно да се вакцинираат. Тој исто така ги потсети пензионерите дека во Предлог – буџетот за 2020 година одвоени се средства за болничко лекување без наплата на партиципација за пензионери со пензија пониска од просечната во земјата.

Филипче потенцираше дека оваа Влада го зајакна македонскиот здравствен систем и воведе вистински мерки во интерес на пациентите и современи услови во болниците.

Во Предлог – буџетот за 2020 година, предвидени се 89 милиони денари за болничко лекување без наплата на партиципација за пензионери со пензија пониска од просечната во земјата. Целта на оваа мерка е обезбедување на грижа во чувањето, следењето и унапредувањето на здравјето на пензионерите, како и заради обезбедување на услови за лекување на пензионерите во болничките здравствени установи низ целата држава, нагласиja на средбата во Сојузот на пензионерите премиерот Заев и министерот за здравство Венко Филипче.

Средбата ја отвори претседателката на Сојузот на пензионери на Македонија, Станка Петрова која поттикна некои од најважните прашања од интерес на пензионерите, на кои премиерот Заев и министерот Филипче одговорија дека се слушнати нивните потреби и дека Владата на Република Македонија активно работи на мерки за нивно исполнување.