Почна асфалтирање на дел од патот кон штипското село Почивало

Почна асфалтирањето на локалниот пат меѓу штипските села Шашаварлија и Почивало. Градоначалникот на Општина Штип, Благој Бочварски, кој денеска изврши увид на градежните работи, вели дека станува збор за асфалтирање на делница од еден километар, чија вредност е 5.897.640 денари.

- Ова значи дека жителите на овие населени места ќе имаат пристојни услови за живот, ќе донесеме патна инфраструктура до нивните домови. Но, ова е многу важно и за сите жители на општина Штип, коишто кога ќе се изгради инфраструктурата, ќе имаат можност почесто и поредовно да патуваат и да го посетуваат овој убав предел од нашата општина. Вредноста на овој проект е околу 5.900.000 денари и се работи за локален пат од еден километар. После завршувањето на оваа делница, ќе бараме средства и ќе проектираме продолжување на делницата кон село Кошево и село Почивало, рече Бочварски.

Тој истакна дека со изградбата на инфаструктурата локалната власт придонесува за рамномерен регионален развој  на територија на општина Штип.