Почна да функционира модуларната болница во Струмица

Поради зголемениот број пациенти кои имаат потреба од болничко лекување и поради исполнетост на капацитетите во примарниот КОВИД-центар, отворена е и ставена е во функција модуларната КОВИД-болница во Струмица, објави директорката на ЈЗУ „Општа болница“, Катерина Кузмановска.

-Во модуларната болница се опфатени пациенти кои доаѓаат на дневно лекување, со полесна клиничка слика. Во неа има 37 болнички кревети. Тие можат да се стават во функција доколку има зголемување на бројот на лежечки пациенти. Истовремено се работи на реновирање на инфективно одделение, како и монтажа на централен довод на кислород што ќе овозможи уште 25 болнички легла со кислородна поддршка на инфективниот оддел, вели Кузмановска.

Додаде дека сите пациенти, на кои им е неопходно болничко лекување, се навремено хоспитализирани и соодветно третирани.

Кузмановска апелира до граѓаните да бидат крајно внимателни и да ги почитуваат мерките за заштита, а се заблагодари на целиот медицински персонал кој вложува надчовечки напори за справување со КОВИД кризата.