Почнаа градежни активности на штипската обиколница

Интензивно се гради втората фаза од обиколницата на булеварот „Гоце Делчев“ во Штип, што ќе овозможи поврзување на индустриските зони со населбите „Автокоманда“, „ 8 Ноември“, „Баби“, „Дузлак“ и „Сењак“. На овој дел од обиколницата ќе се гради и  новиот кружен тек, што ќе го забави сообраќајот за поголема безбедност на учениците, студентите и работниците во околните фабрики. Градоначалникот на Општина Штип, Благој Бочварски на денешната прес-конференција истакна дека втората фаза од обиколницата чини 10.500.000 денари, а се протега од булеварот „Гоце Делчев“ до фабриката за чевли „Баргала“.

-Можам да кажам дека оваа траса веќе е пробиена, оваа улица е веќе споена со улицата од првата фаза и во наредните десет дена ќе почне и оформување на кружниот тек на оваа крстосница. Очекувам веќе за 30 дена да имаме и асфалтирање на крстосницата и на оваа пристапна улица, со што овој проект веќе ќе го привршиме, вели Бочварски.

Тој истакна дека првата фаза од обиколница, што почнува од стариот диспанзер и се протега до „Баргала“, не е комплетно завршена. Фирмата „Актива“, што треба да го постави новиот мост на реката Брегалница се уште работи на изработка на железниот мост, а на улицата треба да се постави и уште еден слој асфалт.

-Најавите од фирмата „Актива “ се дека мостот е со 70 отсо прогрес, направен во нивната фабрика. Носачите се завршуваат, а важно е дека по изработката на елементите од тој мост ќе излезат на терен и ќе почне монтажата, вели Бочварски.

Новата обиколница со првата и втората фаза чини милион евра, а ќе има за цел да се реши сообраќајниот хаос на влезот и излезот од Штип, односно на булеварот „Гоце Делчев“, што е главната сообраќајна артерија кон индустриските зони, факултетите и средното електро-машинско училиште „Коле Нехтенин“. Бочварски очекува градежните активности на двете фази да завршат максимум за два месеца. Обиколницата треба да има и трета фаза, што треба да поминува низ наеслбата „Пребег“ и ќе завршува кај бањата „Кежовица“,  но на неа годинава ќе се работи на техничка документација, што ќе биде вклопена и во новиот Генерален урбанистички план.