Почнува модернизацијата на брзата пруга Белград-Будимпешта

Српската премиерка Ана Брнабиќ утре на железничката станица во Земун ќе го означи почетокот на работите на модернизација и реконструкција на пругата Белград-Будимпешта, соопштија денеска Владата на Србија.

Во рамките на проектот, првата делница на која утре започнуваат градежните работи е онаа од Белград Центар до Стара Пазова.

Како што соопшти Кабинетот на Брнабиќ, со проектот е предвидена комплетна реконструкција и модернизација на градежната и на електротехничкита инфраструктура, со цел зголемување на брзината на движење на возовите на делницата Белград-Батајница до 120 километри на час, а од Батајница до Стара Пазова до 200 километри на час.

Делницата од Белград до Стара Пазова е долга 34,5 километри. Работите на изградба на пругата ќе ги изведуваат две кинески компании, а вредноста на договорт изнесува 350,1 милиони долари.

Брнабиќ денеска на пленарната сесија на Самитот на Кина и земјите од Централна и Источна Европа во Будимпешта, изрази задоволство што Србија ќе преставува една од точките каде ќе се вкрстува новиот „Пат на свилата“, на делот од рутата на експресно поморско-копнената линија и што во Белград ќе се одбележи почнувањето на работите на проектот за модернизација на пругата Белград-Будимпешта.

Брнабиќ во обраќањето го истакна и Договорот за укинување на визите за обичните патни исправи за српските граѓани и граѓаните на Кина на период од 30 дена, потоа воспоставувањето на авиолинијата на релацијата Белград-Пекинг на „Хајнан Ерлајнз“ и почетокот на работата на „Банката на Кина“ во Белград, како централа за цела Југоистична Европа.

Како што соопшти од српскиот владин Кабинет, на свечена церемонија денеска во Будимпешта е потпишан договор за проектирање и изведба на работи на изградба на автопатот Е-763, на Коридорот 11 за делницата Прељина-Пожега долга 30,9 километри во вредност од 450 милиони евра, како и други деловни спогодби и протоколи.