Почнуваат 47 научно-културни средби „10 дена Крушевска република“

 

Покровител на годинашново 47. издание на манифестација е претседателот на Република Македонија Ѓорге Иванов. 

 

-  Свеченото отворање на манифестацијата е на први август во 20.30 часот на платото на споменикот „Македониум“ на Гумење со голем народен собир и богата културно-уметничка програма. Крушево е подготвено за манифестацијата и за пречекот на сите посетители. Извршени се сите подготовки, реконструиран е патот Крушево-Демир Хисар, како и главната сообраќајница во градот, влезот и платото на Гумење. Градот располага со доволен број сместувачки капацитети. Во наредните 10 дена со бројни настани, саеми, изложби, со богата програма, научни трибини ќе се потсетиме на еден од најславните моменти од историјата на македонскиот народ, момент кој треба да биде ѕвезда водилка за сите нас, изјави Дамчески.

 

Директорот на Историски музеј-Крушево Зоран Богески, воедно и член на Советот на манифестацијата, истакна дека како дел од програмата од годинава се враќа одржувањето научни трибини.

 

- Годинава, на 3. август во 11 часот во хотелот „Монтана палас“ ќе се одржи научната трибина „Илинден во историскиот континуитет и создавањето на македонската држава“ на која ќе учествуваат 6-мина еминентни научници, пред се, од Институтот за национална историја и од историски музеј Крушево, изјави Богески.

 

Според Марија Апостолоска од локалната самоуправа на Крушево, утре попладне  пред Столбот на Крушевската република ќе бидат пречекани илинденските коњаници.

 

-  Од 18 часот утре ќе пристигнат коњаниците од Лисиче, од Охрид, од манастирот „Бигоски“ и пешадијата од Битола, рече Апостолоска.

 

На 1.август напладне делегација на манифестацијата ќе ја посети спомен-куќата на Смилевскиот конгрес и споменикот на Даме Груев. Почит ќе им биде оддадена и на илинденските востаници,  пред бистата на Веле Марков, на гробовите на Питу Гули и на Тоше Проески на Гумење.

 

- На први август од 19.30 часот во споменикот „Илинден“ по повод 110 годишнината од загинувањето на претседателот на Крушевската република Никола Карев ќе биде отворена изложба на документи насловена „Никола Карев- патешествие низ документи“ во организација на историски музеј-Крушево. Свечениот чин на отворањето на научно-културните средби „10 дена крушевска република “ се од 20.30 часот на Гумење каде ќе се обратат претседателот и потпретседателот на манифестацијата, Ѓорѓи Дамчески и Манојил Јаковлески, ќе биде прочитан Крушевскиот манифест и ќе биде подигнат бајракот на столбот на Крушевската република, објасни Апостолоска.

 

Манифестацијата до 10. август ќе понуди и изложби, промоција на публикацијата „Крушево-градот на музеите-Првата Република, концерти и бројни други настани.