Предлог-измените на Законот за субвенциониран студентски оброк поминаа на собраниската Комисија за финансирање и буџет

Предлог-законот за измена на Законот за субвенциониран студентски оброк вечерва помина на собраниската Комисија за финансирање и буџет и оди на понатамошна постапка во Собранието.

Три амандмани од опозицијата, меѓу нив и зголемување на субвенционираниот студентски оброк од 140 на 160 денари, не беа поддржани.

Со Предлог-законот за изменување на Законот за субвенциониран студентски оброк се врши проширување на опсегот на корисници и на втор циклус на студии, како и на интегрирани студии на државните и приватните универзитети во земјава, кои немаат месечен приход полем од минималната нето-плата за тековната година.

Субвенциониран студентски оброк е финансиска поддршка во износ од 140 денари, што студентот ја добива од Министерството за образование и наука за купување приготвена храна. Износот на субвенциониран студентски оброк се усогласува во согласност со инфлациската стапка после секоја фискална година, а пред донесување на републичкиот Буџет за следната година.