Променливо време со дожд и снег, пообилни врнежи се очекуваат во понеделник

Утре времето ќе биде променливо облачно, со појава на магла во претпладневните часови по одделни котлини. Во текот на ноќта се очекуваат локални врнежи од дожд, додека на планинските предели ќе има снег, информираат од Управата за хидрометеоролошки работи.

Минималните утрински температури ќе се движат во интервал од -4 до 1 степен Целзиусов, а максималните дневни ќе достигнат од 6 до 12 степени. 

Според прогнозата на УХМР, повремените локални врнежи од дожд ќе продолжат и во недела, а пообилни врнежи се најавуваат за во понеделник, кога на некои од повисоките места дождот ќе преминува во снег.

Краткотрајно стабилизирање на времето се очекува во вторник, додека од среда повторно следува период со нови врнежи од дожд, а на планините од снег. 

МИА