Протест во Охрид за поддршка на приведените за настаните од 27 април

 Членови и симпатизери на ВМРО-ДПМНЕ денеска на Градскиот плоштад во Охрид протестираа против, како што беше речено на собирот, ненародната власт во земјата и приведувањето на нивни членови, пратеници обвинети за настаните во Собранието на РМ на 27 април.

- Македонија е единствената држава во светот каде патриотите треба да одговараат за измислено дело тероризам. Хунтата на СДС погази Устав и закони, се гонат искрени патриоти, а утре ќе биде гонет и затврен секој што ќе се спротивстави на оваа ненародна и марионетска власт, порача претседателот на ОК на ВМРО-ДПМНЕ Кирил Пецаков.

Тој истовремено најави дека и советничката група на ВМРО-ДПМНЕ и Колаицијата „За подобра Македонија“ во знак на поддршка за притворените „уставобранители“ од настаните на 27 април, ќе ја бојкотира работата на Советот на Општина Охрид се до конечно ослободување на приведените.

Инаку, ноќеска непознати сторители ги искршиле прозорците на влезот во седиштето на ВМРО-ДПМНЕ во Охрид, при што се обиделе да влезат и во останатите простории во објектот. Настанот бил пријавен во полиција, екипа на крим-техника извршила увид на лице место и се работи на расветлување на случајот.