Првата група од 200 бегалци од Германија пристигна во Франција

Од Германија во Франција денеска пристигнаа 200 бегалци и тоа е првата група со која почнува реализацијата на ветувањето на францускиот претседател  Франсоа Оланд дека неговата земја ќе помогне во раселувањето на мигрантите низ Европа, пренесе ДПА.

Со автобуси од Минхен бегалците пристигнаа во селото Шампањ-сер-Сен, југоисточно од Париз. Повеќето од нив доаѓаат од Сирија, Еритреја и Ирак. Тие во селото беа пречекани од претставници на Црвениот крст.

Уште 800 лица утре и во петок треба да пристигнат во земјата.

На почетокот на неделата Оланд изјави дека Франција ќе прифати 24.000 бегалци за да го олесни нивниот наплив во Германија - од кои многу патуваа преку Унгарија. 

Од Црвениот крст изјавуваат дека вложуваат напори новопристигнатите бегалци да добијат јазичка, здравствена и правна помош, како и поддршка за стекнување со престојувалиште.  Обработката на документите за легализирање и сместување на бегалците ќе одземе најмалку два месеца.