Путин: Американска делегација следната недела во Москва на разговори за војната во Украина

Претставници на САД се очекуваат во Москва во првата половина од следната недела на разговори за ставање крај на војната во Украина, изјави денеска рускиот претседател Владимир Путин.

Тој ова го изјави на крајот од посетата на Бишкек, главниот град на Киргистан.

Путин рече дека руската страна ќе ја претставуваат претставници на Министерството за надворешни работи и на Претседателската канцеларија, додавајќи дека меѓу нив ќе бидат и неговите помошници Владимир Медински и Јуриј Ушаков.

Дискусиите ќе се однесуваат на исклучително големи и сложени прашања и секое прашање има клучно значење, нагласи тој.

Според информациите од Кремљ, специјалниот пратеник на американскиот претседател Доналд Трамп, Стив Виткоф, се очекува во Москва следната недела. Путин и Виткоф се сретнале во повеќе наврати.

Рускиот претседател ја потврди својата подготвеност да води разговори за предлогот на Трамп од 28 точки за ставање крај на војната, велејќи дека тој би можел да биде основа за иден мировен договор.

Путин уште еднаш јасно стави до знаење дека Русија треба да има целосна контрола врз целиот украински регион Донбас пред прекин на огнот.

Украинската страна постојано го отфрла ова барање, велејќи дека тоа би оставило отворен пат за руски напад врз Киев.