Расчистени улиците во Црешево, се чистат куќите

Сите улици во Црешево се расчистени. Екипи во моментов работат на автобуската станица и на расчистување на најдолните три куќи во селото кои беа најмногу зафатени од поплавите, информира министерот за внатрешни работи Митко Чавков.

Чавков заедно со министерот за транспорт и врски Владо Мисајловски и лидерот на ВМРО-ДПМНЕ Никола Груевски денеска го посети селото Црешево за на лице место да видат како се одвиваат работите за расчистување на последиците од поплавите.

Како што информира Чавков, на жителите на Црешево први на помош им дошла полицијата, а во расчистувањето на последиците од невремето учествувале 200 полицајци, 100 припадници на АРМ и 200 доброволци.

Тој нагласи дека иако се при крај работите за целосно оспособување на  селото, до вторник екипите ќе останат на терен за веднаш потоа механизацијата и машините да бидат префрлени во местата каде што се најпотребни, односно во Стајковци каде се поплавени 700 од вкупно 1.000 куќи.