Реконструиран Домот на културата во Мралино

Во село Мралино во Општина Илинден заврши реконструкцијата на Домот на културата „Мралино“, кој беше пуштен во употреба со пригодна културно-уметничка програма изведена од ученици од подрачното основно училиште „Ристо Крле“ од Мралино и Ансамблот за народни песни и ора „Илинден“.

- Со пуштањето во употреба на овој дом на култура, жителите на Мралино добиваат простории каде што ќе можат да се дружат, да организираат разни манифестации, средби и состаноци. Домот на културата ќе можат да го користат месните заедници, здруженијата на пензионери, здруженијата на жени, на младинци, спортските друштва, односно сите граѓани што ќе имаат потреба за тоа, соопшти Општина Илинден. 

Домот на култура во Мралино има површина од 250 метри квадратни и обезбеден бесплатен безжичен интернет. Со него општината ја заокружува реализацијата на капиталниот проект „Изградба, санација и реконструукција на 10 домови на култура“. Во рамки на проектот се изградени, реконструирани, опремени и предадени во употреба девет домови на културата: „Илинден“, „Кадино“, „Мршевци“, „Бујковци“, „Дељадровци“, „Бучинци“, „Бунарџик“, „Текија“ и „Ајватовци“.