Родено 16 недели предвреме - девојче родено со само 300 грама одржано живо од германски лекари

Во Универзитетската болница во Магдебург, германските лекари постигнаа вистинско чудо - успеаа да спасат живот на предвреме родено девојче тешко само 300 грама пренесува „Билд“.

Од болницата наведуваат дека случајот претставува „исклучителен медицински успех“, затоа што бебето било родено цели 16 недели пред очекуваниот термин – состојба која во медицината се смета за екстремно ризична. Веројатноста за преживување на вакви бебиња во светски рамки е околу 25 проценти.

„Новороденчето беше поврзано на апарат за дишење цели седум недели, пред конечно да успее самостојно да дише. Станува збор за исклучително чувствителен и внимателен процес на лекување,“ објасни д-р Ралф Бетгер, раководител на одделот.

Тој додаде дека родителите останале во болницата подолго време за да можат да ја зацврстат врската со своето дете, а девет недели по предвидениот термин конечно го однеле девојчето дома.

Според Гинисовата книга на рекорди, најмладото преживеано предвремено родено дете е Неш Кин од САД – роден 19 недели порано со тежина од само 283 грама, кој во јули годинава го прославил својот прв роденден.