Рударите од Зеница го продолжија штрајкот со глад

Рударите од Зеница одлучија да го продолжат штрајкот со глад до исполнување на нивните барања и очекуваат преговори со претпоставените.

Осумнаесет рудари од Зависното друштво Рудници за темен јаглен Зеница (ЗД РМУЗ), кои синоќа стапија во штрајк со глад, одлучиле да истраат во своите барања, потврди претседателот на Синдикатот на ЗД РМУЗ, Изудин Спахијај.

Тој нагласи дека штрајкот ќе трае се до деблокирање на сметката и пензионирање на 36 нивни колеги, кои во текот на минатата година добиле решенија за пензионирање, но поради неплатени придонеси не можат да го остварат тоа право.

Како што порачуваат, овој пат нема да се согласат само на еднодневна деблокада на сметката, со цел на нив и на колегите од Бреза да им бидат исплатени платите.