Санкционирани загадувачи на воздух во Бардовци

Овластениот инспектор за животна средина и комуналните редари од општина Карпош денеска при континуирана контрола на локација во населбата Бардовци утврдиле неовластено палење на отпад (гуми, кабли, пластика).

Инспекторот, како што информира општина Карпош, побарал асистенција од полицијата која извршила увид, при што го идентификувале лицето кое палело недозволени материјали. Комуналните редари од општина Карпош на сторителот на прекршокот му изрекле казна, согласно Законот за јавна чистота.

- Контролата на инспекторот и комуналните редари продолжува и наредните денови со цел да се спречат овие сериозни прекршоци од несовесните граѓани, соопшти од општина Карпош. 

Општина Карпош апелира до своите сограѓани на поголема свесност бидејќи, како што се наведува, при согорување на овие материјали се предизвикува опасен ефект, при што се ослободуваат токсични супстанци во воздухот.