Се продлабочува кризата во владината коалиција на Австрија

Несогласувањата во владината коалиција на Австрија се продлабочија денеска откако канцеларот Кристиан Керн се закани дека во иднина ќе работи без помладиот партнер во Владата, доколку нејзиниот лидер не стане заменик-канцелар. 

Социјалдемократот Керн изјави дека ако лидерот на Австриската народна партија (ОВП) и шеф на дипломатијата Себастијан Курц, не ја прифати функцијата заменик-канцелар, тој ќе побара поддршка  од опозициските партии во Парламентот за формирање малцинска Влада. 

Курц, кој во неделата беше избран за лидер на ОВП, ја одби функцијата заменик-канцелар, која традиционално ја има првиот човек на помалиот коалициски партнер во Владата. 

Денешната изјава на Керн ги отсликува тензиите меѓу двете партии во владејачката коалиција пред предвремените избори на есен. 

Аналитичарите го толкуваат одбивањето на Курц да ја прифати вице-канцеларската функција како предизборен обид да се дистанцира од негативниот имиџ на владејачката коалиција пред изборите.