Се уредува пешачкиот дел на штипскиот Градски стадион

Штипското претпријатие  „Стипион 2011“ и Општина Штип  работат на доуредување на пешачкиот дел на градскиот стадион. Градоначалникот на Општина Штип, Благој Бочварски на денешната прес конференција рече дека се работи за поставување на бехатон и тампонирање на дел од пешачките патеки во стадионот.

–Се работи за поставување нова подна површина на источната трибина на влезот на стадионот, но и на сите околни стази што стручните луѓе навистина правеа проблем и поради тоа сите површини во близина треба да бидат покриени со бетонска подлога, бехатон или тампонирање. Паралелно со тоа ќе се работи и на санација на потпорните ѕидови што беа дотраени и срушени, вели Бочварски

Инвестицијата на Општина Штип изнесува околу 1,5 милиони денари. Бочварски потенцираше дека паралелно со инвестициите на Општина Штип, голема поддршка за реконструкција на овој терен дава и спонзорот и сопственикот со 51 отсто од акциите на ФК Брегалница, компанијата КИТ-ГО и нејзиниот сопственик Кирил Гогов.

Бочварски најави дека наредната година се очекуваат и сериозни реконструкции на трибините, според проектот што општина Штип го има и го презентираше пред граѓаните.