Шесто место за Македонија на СП во ракомет за младинци

Младинската ракометна репрезентација на Македонија (играчи до 21 година) Светското првенство во ракомет што се одржува во Алжир го заврши на шестото место што претстаува историски резултат и најдобар пласман на една македонска репрезентација на Светските првенства. Во натпреварот за 5.место попладнево Македонија загуби од Унгарија со 26:22 (14:11).

Избраниците на селекторот Илија Темелковски последниот натпревар на шампионатот го почнаа и до средина на првиот дел двете селекции се менуваа во водството. Во 18.минута беше 9:9, а потоа противникот направи серија 3-0 и на полувреме имаше три голови разлика. Во вториот дел Унгарија го зголеми водство на 17:12, а нашата селекција во 49.минута намали на 18:20, но немаше сили за пресврт.

 

Најефикасен во нашата репрезентација беше Марко Нелоски со 6 голови, додека на дуелот најпрецизен беше Марк Ковач со 8 голови.

 

Во натпреварот за 7.место на шампионатот Тунис ја победи Русија со 36:21, а до крајот остануваат да се одиграат уште „малото финале“ меѓу Франција и Германија и финалето помеѓу Шпанија и Данска.