Шилегов: Новиот ГУП ќе ја спречи изградбата на јужната обиколница

Во новиот Генерален урбанистички план нема да постои траса за јужна обиколница, најави градоначалникот на Скопје, Петре Шилегов. Тој вели дека Скопје треба да биде зелен град, а изградбата на оваа обиколница би уништила голем дел од Водно, што би значело повеќе штета отколку придобивка за градот.

 

Министерот за транспорт и врски, Горан Сугарески, вели дека Министерството целосно ги поддржува замислите на градот, не само во делот на финансиска помош, туку и во делот на обезбедување стручност. Целта, според министерот, е да се обезбеди баланс меѓу развојот на стопанството и заштитата на животната средина.

 

Надлежните велат дека не можат да гарантираат дека нема да се гради во централното градско подрачје, но доколку се гради, тоа би било плански и согласно генералниот и деталните урбанистички планови.

 

Постоечкиот генерален урбанистички план важи до 2022 година, а новиот, според надлежните, ќе се донесе во комуникација со сите засегнати страни. Новиот ГУП, кој што е основа за носење подоцна и на деталните урбанистички планови, се однесува на периодот 2022-2032 година.