Симпатизерите на Движењето Пет ѕвезди ја прифатија идејата за приклучување кон евролибералите во ЕП

Симпатизерите на евроскептичното италијанско Движење Пет ѕвезди ја прифатија идејата на неговите европратеници да ја напуштат парламентарната група на евроскептиците во Европскиот Парламент и да се приклучат кон групата на европски либерали. 

Идејата беше иницирана од основачот на движењето Бепе Грило. 

При онлајн гласањето 78,5 отсто од симпатизерите ја поддржаа промената. 

Досега Движењето Пет ѕвезди беше во парламентарната група наречена Европа на слободата и директната демократија, а во неа е и Партијата на независноста на Обединетото Кралство на Најџел Фараж.

- Да останеме во таа група значи следните две и пол години да ги минеме без заедничка политичка цел, истакна Грило. 

- Последните случувања во Европа, како на пример Брегзитот, не принудуваат да ја преиспитаме природата на оваа парламентарна група. Со неверојатен успех во кампањата „Напуштање на ЕУ“ партијата за независност на Обединетото Кралство ја постигна нејзината политичка цел - излез од ЕУ. Фараж веќе се откажа од лидерството и англиските европратеници ќе го напуштат ЕП до следните избори, дополни Грило, наведувајќи дека така неговото движење ќе остане изолирано во ЕП. 

Сега пратениците на Грило во ЕП ќе се приклучат кон Алијансата на либералите и демократите за Европа. 

На тој начин таа група ќе стане трета по големина во ЕП, по оние на Европската народна партија и групата на социјалистите и демократите. 

Одлуката за промена на парламентарната група е пресврт во ставот на Грило.  Тој се заложи за референдум во Италија за откажување од еврото, а евролибералите се токму оние кои го штитат еврото и поголемата европска интеграција.