Со „Македонија вработува 2“ во Дебар и Центар Жупа нови 30 вработувања

Преку владиниот проект „Македонија вработува 2“ во општините Дебар и Центар Жупа, остварени се 30 нови вработувања, а при крај е постапката за уште десет.

- Како и „Македонија вработува“ така и „Македонија вработува 2“ поради поволностите кои се нудат побудуваат голем интерес кај работодавачите и невработените и слободно може да се оцени дека овој мега проект на Владата и понатаму прокнижува позитивни резултати. Од април 2015 до април 2016 година остварени беа 306 нови вработувања, а сега за два месеца 30. Тоа се повеќе од позитивни бројки, ако се има во предвид дека станува збор за две мали и недоволно развиени општини, изјави за МИА, Афет Авмедоски, раководител на дебарскиот Центар за вработување, кој со својата активност ја покрива и општина Центар Жупа.

Благодарение на овој и другите проекти од оперативниот план на Владата за вработување, оценува Авмедоски, видно е намален бројот на невработените кои се во евиденцијата на Центарот за вработување.

Според него, во последните години со спроведувањето на мерките од оперативниот план, бројот на невработените е речиси преполовен.