Собранието ќе ја продолжи конститутивната седница по редовната пауза

Собранието на Република Македонија и денеска ја продолжи конститутивната седница за избор на претседател, заменик на претседателот, членови и нивни заменици на Комисијата за прашања на изборите и именувањата. Седницата ќе продолжи по редовната пауза.

Драган Цуклев од ВМРО-ДПМНЕ порача дека изборот на претседател на Собранието не треба да се базира на постизборни математики, туку на резултатите од изборите и треба да го добие онаа политичка опција која има најголем број освоени мандати.

Илија Димовски од ВМРО-ДПМНЕ нагласи дека е несомнено оти 20 пратеници имаат право да предложат претседател на Собранието, но оти е несомнено дека и други 20 пратеници можат да го направат тоа, а исто може да направи и  Комисијата за избори и именувања.

Неговата сопартијка Магдалена Манаскова, пак, посочи дека не може да се изостави и волјата на 200.000 граѓани кои секојденвно се на улиците низ државата.

Во процедурално обраќање Мери Лазарова од СДСМ рече дека пратениците на ВМРО-ДПМНЕ прават свесна опструкција на изборот на претседател на Собранието на Република Македонија и го злоупотребуваат Собранискиот деловник со меѓусебни реплики.

На дневен ред на седницата е и изборот на претседател на Собранието на Република Македонија.