Советот на Гевгелија го усвои Развојниот план за 2018

Развојниот план на општина Гевгелија за 2018 година, чиј предлагач беше градоначалникот Сашо Поцков, доби зелено светло од општинските советници кои беа информирани дека е составен од 26 развојни потпрограми поделени во осум програми.

Поцков посочи дека ќе продолжи реализацијата на веќе започнатите капитални проекти како новиот водоснабдителен систем, доизградба на нови 14 училници во СОУ „Јосиф Јосифовски“ регулација на дел од коритото на Сува река, пречистителната станица за фекална канализација во Гевгелија и довршување на примарната и секундарната сообраќајна мрежа во мултинаменскиот комплекс „Милци“.

- Покрај ова, приоритет во општина Гевгелија во наредната година ќе биде изградбата на нова детска градинка, гасификацијата на општината, изгрдбата на катна гаража, уредување на нов градски парк и плоштад, проширување на атмосферската канализациска мрежа и замена на азбестните цевки во водоводната мрежа во Гевгелија и населените места, нагласи градоначалникот Поцков.

Амбициозниот развоен план на општина Гевгелија за 2018 година исто така предвидува отворање на мултимедијален културен центар, стационар за бездомни животни,довршување на заобиколниот пат околу Гевгелија и доизградба на спортско-рекреативниот комплекс со базен, информира Поцков.