Србија/Локални избори: Почна предизборниот молк

Предизборниот молк пред локалните избори во Србија почна на полноќ и ќе трае до затворањето на гласачките места на 2 јуни во 20 часот.

Во тој период, на медиумите и на јавните собири им  е забрането да презентираат кандидати и партиски програми, да повикуваат гласачи како да гласаат како и да објавуваат проценки за изборните резултати.

Претседателката на Собранието на Србија, Ана Брнабиќ, на крајот на април распиша избори за 2 јуни во 66 единици на локалната самоуправа, на истиот ден кога ќе се одржат изборите за советници во градското собрание на Белград, како и за градските општини.

В недела, на 2 јуни, повеќе од 4,2 милиони граѓани на Србија ќе избираат советници на локалните избори во 88 градови и општини. Граѓаните ќе избираат од 14 изборни листи.

Локалните избори ќе се одржат во оние општини каде што не се гласаше во декември 2023 година. Ова гласање се одвива по измените на Законот за локални избори и на Законот за единствен избирачки список.

Претходните локални избори во повеќето од тие места се одржаа во 2020 година, заедно со парламентарните и покраинските избори, под специфичните услови во пандемијата на коронавирусот.