СЗО бара построга политика за алкохолот во борбата против рак во ЕУ

Светската здравствена организација (СЗО) повика на решителни политички мерки против алкохолот за да се спречат десетици илјади случаи на рак во Европа, се вели во соопштение објавено денеска.

– Силните политики за алкохол се меѓу најпаметните инвестиции што можете да ги направите, наведоа Регионалната канцеларија на СЗО за Европа и Меѓународната агенција за истражување на ракот (ИАРК) при претставувањето на сеопфатниот извештај за превенција на рак.

Таквата политика спасува животи, заштедува пари и покажува резултати во рок од неколку години, стои во соопштението.

Во новиот извештај, податоците на СЗО покажуваат дека Европската унија е субрегион со највисока потрошувачка на алкохол во светот, а воедно и еден од регионите каде што ракот веќе се смета за водечка причина за смрт.

Во 2020 година, алкохолот предизвикал околу 111.300 нови случаи на рак во Европската унија, меѓу кои десетици илјади случаи на рак на дебелото црево, дојка и уста.

ИАРК за првпат подетално ја разгледува превенцијата на случаи на рак поврзани со алкохолот, кои, според експертите, вклучуваат најмалку седум различни типови рак.

Наодите од извештајот не оставаат простор за сомнеж, според копенхашката канцеларија на СЗО за Европа: „Оданочувањето на алкохолот, ограничената достапност и строгите забрани за рекламирање ја намалуваат потрошувачката на алкохол на ниво на популација и, со тоа, го намалуваат товарот од рак.“

Гундо Вајлер, директор за превенција и промоција на здравје при СЗО Европа, изјави дека земјите од ЕУ субрегионот плаќаат премногу висока цена за алкохолот – во форма на рак што може да се спречи, растурени семејства и милијарди евра трошоци за даночните обврзници.

– Европскиот регион на СЗО не може да си го дозволи привидот дека консумирањето алкохол е безопасно, додаде тој.