Тешка сообраќајка кај Солун: Се судрија камион и автомобил – Двајца мртви, две лица повредени

Во сообраќајна несреќа на грчкиот национален пат Солун-Серон денеска загинаа двајца родители, а две деца (12 и 10) се повредени.

Помладото момче се здобило со полесни повреди и е надвор од животна опасност, додека на постарото момче ќе му биде извршена операција.

Како што пишува грчкиот портал „Прототема“, во судир на возило со романски регистарски таблички и камион загинале две лица на возраст од 49 и 45 години. Брзата помош ги пренесе повредените момчиња во општата болница во Солун.

Според информациите на друг грчки портал „Тестивал“, постарото момче е тешко повредено и се наоѓа на детска хирургија во болница. Тој ќе биде опериран и хоспитализиран на детската интензивна нега во друга болница во Солун.

Неговиот помлад брат е надвор од животна опасност и се лекува на Клиниката за детска хирургија во Општата болница Папагеоргиу. Според веб-страницата, децата се свесни и комуницираат со околината.