Трамп одбива да врати погрешно депортиран човек и покрај одлуката на Врховниот суд

Администрацијата на претседателот Доналд Трамп и претседателот на Ел Салвадор, Наиба Букела, јасно ставија до знаење за време на состанокот во Овалната соба дека маж од Мериленд, кој неправедно беше депортиран во Ел Салвадор, нема да биде вратен во Соединетите држави.

Иако американскиот Врховен суд одлучи дека американските власти мора да го „олесни“ враќањето на Килмар Армандо Абрего Гарсија, претставници на Белата куќа тврдат дека одлуката за неговото враќање зависи исклучиво од Ел Салвадор.

Запрашан директно од Кејтлан Колинс од Си-Ен-Ен дали ќе го врати, Букеле рече дека идејата е апсурдна:

„Се надевам дека не ми сугерирате да прошверцувам терорист во Соединетите држави. Како можам да прошверцувам терорист во САД? Се разбира, нема да го сторам тоа. Самото прашање е апсурдно“, рече Букеле.

Високи претставници на администрацијата ја оспоруваат одлуката на судот, тврдејќи дека судот не може да интервенира во водењето на надворешната политика. Врховниот суд не ја поништи одлуката на понискиот суд, но рече дека владата мора да го олесни враќањето доколку се согласи Ел Салвадор, но дека не е обврзана самата да ја спроведе.

Иако Трамп претходно изјави дека го почитува Врховниот суд и дека ќе го врати доколку тоа му биде наредено, тој вчера избегна да даде јасен одговор.

На состанокот во Овалната соба, Трамп го повтори ставот на неговата администрација, повикувајќи ги државниот секретар Линда Мекмахон, државниот обвинител Пем Бонди и советникот Стивен Милер да потврдат дека САД немаат овластување да го вратат Абрего Гарсија без согласност на Ел Салвадор.

„Ако Ел Салвадор сака да го врати, ќе го олесниме – на пример, да обезбедиме авион“, рече Бонди.

Абрего Гарсија илегално влегол во САД околу 2011 година, но судијата за имиграција во 2019 година одлучил дека не треба да биде депортиран бидејќи во Ел Салвадор го гони банда која му се заканува со смрт поради неговиот семеен бизнис.

И покрај таа одлука, тој беше депортиран, а сега администрацијата на Трамп одлучи да не го враќа.

За време на состанокот, Трамп го повика Букеле да изгради повеќе мегазатвори, како озлогласениот CECOT (Цивилизациски центар за терористичка изолација), кој Букеле им го нуди на САД за сместување на депортираните за одреден надомест.

Трамп отиде чекор подалеку предлагајќи американските граѓани да бидат испратени во Ел Салвадор доколку се насилни криминалци:

„Ако се работи за домашен криминалец, јас немам проблем со тоа“, рече Трамп. „Мислам на насилни луѓе. Навистина лоши луѓе. Исто толку лоши како и оние кои доаѓаат однадвор“, додаде тој.

Според договорот објавен претходно оваа година, Ел Салвадор се согласи да прифати депортирани насилни криминалци без оглед на нивното државјанство, што наиде на критики од правните организации и организациите за човекови права.

Букеле е познат по неговиот строг став кон бандите, но и по суспендирањето на граѓанските слободи. Тој се нарекува себеси „најкул диктатор во светот“ и „крал филозоф“, а меѓународните организации предупредуваат на масовно кршење на човековите права.

И покрај ова, Букеле е исклучително популарен во Ел Салвадор, каде минатата година беше реизбран со убедлива победа.

Трамп го пофали како „претседател Б“, му се заблагодари што „великодушно ги пречекал најнасилните странски непријатели на Америка“ и вели дека „врши фантастична работа“.

„Неговиот затвор е полн со навистина лоши луѓе“, рече Трамп, отфрлајќи ја загриженоста за човековите права.