Трамп: Одлуката на судијата од Сиетл е смешна

Американскиот претседател Доналд Трамп денеска како „смешна“ ја оцени и ја отфрли  одлуката на федералниот судија од Сиетл, Џејмс Робарт, за одбивање на примената на неговата уредба за забрана за влез во САД на државјани од седум муслимански земји.

„Мислењето на овој таканаречен судија, кој ја отфрли примената на законот, е смешно и ќе биде соборено“, напиша Трамп на својот налог на Твитер.

Трамп додаде дека „доколку некоја земја повеќе не е во состојба да каже кој може,а кој не може да влезе и да излезе однеа, особено од безбедносни причини“, тогаш тоа е „голем проблем“.

Федералниот судија за подрачјето на Сиетл, Џејмс Робарт, вчера издаде привремена забрана за примена на цела територија на САД на извршната уредба на американскиот претседател Доналд Трамп за привремена забрана на влез во САД на државјаните од седум земји со муслимански мнозинства.

Француските медиуми ја наведуваат изјавата на Генералниот обвинител на американската сојузна држава Вашингтон, Боб Фергусон, подносител на жалба на уредбата на Трамп, дека судијата Робарт на таа функција го поставил некогашниот републикански претседател на САД Џорџ Буш помладиот.

-Уставот денеска надвладеа. Никој не е над законот, па дури ни претседателот, рече Фергусон, реагирајќи на пресудата што ја донесе Робарт.

Британските медиуми наведуваат дека оваа пресуда од Сиетл опфаќа најширок опсег во однос на уредбата на Трамп, што беше потпишана минатата недела.

Министерството за правда објави дека нема да бара итно стопирање на пресудата на судијата од Сиетл, додека Белата куќа најави дека тоа ќе го стори министарството „што е можно побрзо“ и вети дека ќе се бори против оваа пресуда.