Турција го повика светот да го признае источен Ерусалим за палестински главен град

Турскиот министер за надворешни работи Мевлут Чавушоглу денеска го повика светот да го признае источен Ерусалим за палестински главен град.

Повикот беше упатен на отворањето на вонредната седница на врвот на Организацијата за исламска соработка .

- Прво, палестинската држава треба да биде призната од сите останати држави. Ние сите треба да се бориме за тоа. Треба да побараме од другите држави да ја признаат палестинската држава врз основа на границите од 1967 година и со главен град источен Ерусалим, нагласи Чавушоглу.

Турција е ротациски претседател на ОИС и побара вонредна седница во Истанбул по одлуката на САД да го признаат Ерусалим за главен град на Израел. Целта е да се донесе заедничко решение како одговор на одуката на Трамп.