Уапсен е раководител во општината Маврово и Ростуше, договорил поткуп од 13.000 евра

Полицијата денеска го уапсила раководителот на Одделението за урбанизам и комунални дејности во Општината Маврово и Ростуше, откако бил фатен како прима дел од договорен поткуп за да одобри проект за изградба на апартмани, соопшти полицијата.

„На ден 19.03.2025 година, Одделот за сузбивање на организиран и сериозен криминал (ОСОСК) реализираше случај на поткуп при што лишен од слобода е Раководителот на Одделението на урбанизам и комунални дејности при Општина Маврово и Ростуше, Садредин Елезоски. Поткупот бил побаран и примен заради ветување дека ќе биде одобрен урбанистички проект за градење на апартмани и сместувачки капацитети. Поткупот бил побаран во износ од 13.000 евра и требало да се исплати во неколку рати. Лицето е лишено од слобода при исплата на парите од првата рата во угостителски објект во Скопје, откако истите биле претходно криминалистичко-технички обработени“, велат од МВР.