Уапсен Ламбе Алабаковски - го запалил Културниот клуб во Битола

Пејачот Ламбе Алабакоски е човекот кој го запали клубот „Ванчо Михајлов“ во Битола, потврдуваат извори од МВР.

Претходно, министерот за внатрешни работи, Оливер Спасовски објави дека сторителот е идентификуван и оти станува збор за 34-годишник од Битола со иницијали Л.А.

-Со задоволство можам да обзнанам брза и ефективна разрешница на случајот од пред три дена (04.06.2022) со кривично-правниот настан - пожар во центарот „Иван Михајлов“ во Битола, кој е веќе расчистен и имаме приведено лице кое го призна делото. Се работеше деноноќно да се изнајде сторителот, се земаа предвид сите докази, а по извршените службени разговори во изминатите денови, вчеравечер, со судска наредба, беше извршен претрес на две локации кои ги користи Л.А.(34) од Битола, при што се пронајдени и одземени предмети поврзани со кривичното дело, по што лицето е лишено од слобода, вели Спасовски.

Министерот вели дека нема да има „пардон“ за случајот.

Претходно опис на пирмонот во јавноста објави бугарската министерка Теодора Генчовска која од Скопје отиде во Битола за да ја види состојбата на клубот.

– На снимките на една од камерите можев да видам човек кој мирно пристигнува со велосипед, вади цевка со запалива течност и мирно ја истура течноста пред вратата од куќата. Оваа смиреност беше малку нарушена, бидејќи пожарот што избувна беше огромен, се исплаши, се сомневам дека лицето има некои повреди од овој пожар, можеби ќе побара лекарска помош. Човекот носи маска, рече Генчовска додавајќи дека лично смета дека ова „дело е направено ладнокрвно, смислено и намерно“, рече Генчовска и додаде дека овој настан нема да влијае на односите меѓу РСМ и Бугарија.