Успешен настап на камерниот хор „Мелодиум“-Битола на фестивал во Солун

Камерниот хор „Мелодиум” од Битола успешно настапи и е награден на Меѓународниот фестивал за филхармониски хорови и оркестри, кој деновиве се одржа во сала на Операта во Солун, Грција.

На 8. по ред издание на фестивалот во Солун настапија 52 хорови и оркестри од повеќе европски држави, а македонскиот претставник „Медлодиум“ на своето второ учество доби и награда, истакна Марина Коруновска, раководител на хорот.

- Нашето учество во Солун беше помогнато од Македонскиот конзулат во Солун и конзулката Маја Апостолова. Нашиот настап беше поздравен со бројни аплаузи и овации, и тоа мотивира да продолжиме со работа бидејќи овој хор е единствен од ваков тип во југозападниот дел на Македонија, посочи Коруновска.

Камерниот хор „Мелодиум” од своето формирање па до денес, учествувал на концерти во повеќе држави, односно во Србија, Словенија, Грција, Бугарија и во повеќе македонски градови, а во меѓувреме доби покани за пролетен настап во Атина, а во јуни наредната година младите членови на хорот ќе приредат концерт и во Виена.