Уставниот суд ја одржува првата седница во 2026 година – на дневен ред девет иницијативи за оценка на уставност и законитост

Уставниот суд денеска ќе ја одржи првата седница во оваа година, со дневен ред на кој се закажани девет иницијативи за оценување на уставност и законитост, едно барање за заштита на слободи и права и три предлози за одлучување со Нацрт-одлука.

На дневен ред на денешната седница е иницијативата со која е оспорен член 2 ставови 1 и 4 и член 73 од Законот за Народната банка на Република Северна Македонија. Подносителот на иницијативата Славко Лазовски смета дека Народна банка е привилигирана во однос на даночни ослободувања и олеснувања кои според него немаат смисла и оправданост и истото е спротивно на владеењето на правото, како темелна вредност на уставниот поредок, член 33 и член 51 од Уставот на Република Северна Македонија.

Пред судиите ќе се најде и иницијативата во која е оспорен член 60 став 3 алинеја 2 од Законот за управните спорови. Подносителот на иницијативата Александар Наумовски смета дека оспорената одредба предизвикува дилеми, непрецизна е и нејасно е имплементирањето во праксата. Во иницијативата се наведува дека не е во согласност со владеењето на правото, со одредби од членот 50 и Амандманот XXI на Уставот.

На денешната седница, меѓу другите точки се и иницијативите за оспорување на членови од Законот за извршување, Колективниот договор за здравствената дејност, правилници за распределба на авторски надоместоци, геодетски работи за посебни намени, како и локални акти од Општините Гостивар, Тетово и Карпош. 

МИА