Вечерва во 18 часот се осветлува Скопје: Ѓорѓиевски најави богата новогодишна програма на плоштадот „Македонија“

Градоначалникот на Скопје, Орце Ѓорѓиевски, ги повика граѓаните вечерва во 18 часот на плоштадот „Македонија“, каде што свечено ќе биде означен почетокот на новогодишните и божиќните празници со осветлување на градот.

Според најавите, скопјани ги очекува посебна празнична атмосфера, богата програма со забава, музика, бројни подароци и изненадувања за сите генерации. Како што истакна Ѓорѓиевски, годинава празничниот дух повторно се враќа во срцето на градот.

„Нашиот град е најубав тогаш кога свети од радост, насмевки и празнична магија. И младите и возрасните ја заслужуваат топлината што ја носат Новогодишните и Божиќните празници. Со огромна радост ве поканувам заедно да го означиме почетокот на едно ново празнично поглавје исполнето со забава, музика, подароци и омилените херои кои ќе ги израдуваат најмалите“, напиша Ѓорѓиевски на својот Фејсбук профил.

Тој најави дека од утре па сè до 31 декември секојдневно ќе се одржуваат настани и забави за сите генерации, а дочекот на Новата година ќе биде спектакуларен и незаборавен.

Ѓорѓиевски претпладнево на прес-конференција ќе информира и за деталите околу новогодишното украсување, како и за целосната празнична програма и настаните во организација на Град Скопје.