Велика Британија вети 142 милиони долари помош за ранливите земји за справување со Омикрон

Велика Британија вети 105 милиони фунти (141,7 милиони американски долари) итна помош за ранливите земји, особено во Африка, за да се справат со ширењето сојот омикрон на коронавирусот.

Владата во Лондон синоќа соопшти дека парите ќе бидат искористени за мерки за намалување на ширењето, зајакнување на тестови и зголемување на залихите на кислород.

Министерството за надворешни работи истакна дека Лондон веќе ја исполнил својата обврска да обезбеди 30 милиони вакцини на други земји до крајот на 2021 година, како дел од вкупно 100 милиони дози што Велика Британија вети дека ќе ги донира.

Британската Влада досега донираше 24,6 милиони дози на глобалната мрежа за дистрибуција на вакцини Ковакс и 5,5 милиони директно на сиромашните земји како Кенија, Јамајка и Индонезија.