Визуелниот уметник Филип Јовановски учествува на групна изложба во Белград

Визуелниот уметник Филип Јовановски учествува во групната изложба „Сведоштва - вистина или политика: Концептот на сведоштва во спомен на југословенските војни”, која вечер ќе биде отворена во Белград. 

Јовановски ќе се претстави со делото „Предлог за споменик на комунистичката курва”, аудио опера во пет дела кое како истражувачки процес го работеше во соработка со кураторката Ивана Васева и дизајнерот на звук Сашко Потер Мицевски.

Ова е најново дело на Јовановски во кое тој продолжува да го истражува својот долгогодишен интерес фокусиран на конфликтот помеѓу доминантниот дискурс - националистичкиот и конзервативен кој,  како што истакнува, го потиснуваше јавното мислење во изминатите 11 години во македонскиот културен и политички живот, и другиот, оној потиснатиот - модернистичкиот и прогресивен. 

Групната изложба ќе биде отворена во 18 часот во Музејот на современа уметност Галерија – легат Милица Зориќ и Родољуб Чолаковиќ во Белград. Курирана е од уметницата и активистка Ноа Трајстер (Центар за културна деконтаминација од Белград) и кустосот од Музејот на современа уметност од Белград, Зоран Ериќ.